Kawlram lei in hlasa minthang Sung Tin Par le Van Dawt Cin (Moe Moe) cu Australia Chin Community (Eastern Melbourne) nih hlasa dingin an sawm hna i a ralaimi June 25 ni zaanah hlunghlai takin Zaisawmrel (Concert) ngeihding an i tim tiah thawngtheih asi."Australia Chin Community (Eastern Melbourne) cu kan miphun chung i hlasa thiam pawl sunhsak an tonvenak ding a zuam pengmi miphun caah rian a ṭuanmi community bu asi bantukin atutan i Sung Tin Par le Van Dawt Cin visa an hmuhnak ding ca zong a tawlreltu an si". Australia ah Zaisawmrel(Concert) tuah ding in hlasa minthang hna a au khomi, cozah nih theihpimi le nawlpek cangmi community bu a si.Hlasa an pahnih tein Visa an hmuh cang. Arauhhlan ah Melbourne ah an rak phan cang hna lai. An van phanh lai cu kan i ngaih ko cang! "Zaisawmrel (Concert) tuah nakdingah Minung 1000 thlum George Wood Performing Art Centre cu hlan cia a si cang. Chanthar sound system le lightning system a umnak standard a sang i a ropui bakmi Concert Hall pi a si" tiah David Ca Lian Thang nih Lai Forum ah a chim.
http://115.124.4.6:81/index.html
Ref: Lai Forum

Lai ramkulh cozah sianginn cachim saya pawl cu anmah pumpaakin sianginn ah kai ti loin midang kha an nihlawh,lahkhah peek dingin anmah aiawh ah mi an hlaan i ca chimhter a tam tiah thawng kan theih."Atu lio Falam peng chungah sianginn cachim minung ( 30 ) hrawng cu anmah pumpaak sianginn ah kai ti loin midang kha an lahkhah peek dingin an hlaan hna tiah" fiimnaak lei,pyngiazi vuanṭhan pakhat nih a chim. Mah siang cachim saya te nihcun an hlaanmi hna kha an lahkhah a dihlak in an peek hna le anmah cu rian an ttuan hna tiah theih a si."Siang cachim a tam u hna cu Mizoram ah an kal i thil an zuar hna tiah" Hakha Khuaipi uknaak lei zung vuanṭhan pakhat nih a chim.
         Atulio sianginn cachim minung pakhat i an nihlawh,lahkhah hi 30000-50000 hrawng a si i an inn chungkhar eidin pawcawmnaak an i thaat lo caah a tu bantukin siang cachim,mi an hlaannaak hna a si tiah theih a si.Mah kong he i pehtlaiin Falam Khua in mi pakhat nih "cunglei zong nih zeihmanh a ziizut,tantatnaak a um lo,an hlaanmi hna le tanghra zong a awng lomi ansi hna caah kan fale hmailei an ca ahcun a fawi lo" tiah a chim. Cubantukin Sagaing ramtthen Kalay,Tamu Khau i cozah rianṭuan pawl hna zong lahsameh in khunh an la hna le anmah pumpaak rian an ṭuan hna tiah an chim."Cozah rianttuan a si lomi an fale cu Motor saikel he zeihe an i ciit,an i chawk hna,kannih vuantthan pawl fale cu sianginn hmanh kan kaiter kho hna lo,cucaah pumpaak in phaisa kan hawl lo awk a ttha lo" tiah cozah rianṭuan pakhat nih a chim.

India-Myanmar ramri Tiva in Mizoram khualipi Aizawl ah a rak kaimi khualtlawngmi motor pakhat cu tuzing zingka may 27-2011 ah ai leh caah cu ai lehnaak hmunah cunLaimi nu pakhat a thi colh i, minung ( 5 ) faakpiin an i hliam tiah thawng kan theih. Sumo motor cu ramri tiva Zokhuathar khuate in Aizawl khua ah a rak kaimi zaan i a kalmi motor a si i, Aizawl khua a luhhlaan Tuirial khuate ah pe ( 50 ) a saangmi lamthlang ah a tla tiah kan theih. A thimi Laimi nu cu Kap Lian Mawii ( 56 ) a si i Kawlram Sagaing ramtthen Kalaymyo, Munlai khuate ah a ummi a si tiah theih asi.Faak piin ai hliammi ( 5 ) hna cu Mizoram mi an si tiah theih an si. "Tuzing sml 4.00 am hrawngah Seling kan phan tiah phone an van ka chawnh,ph an ka chawnh naak zong a rau lo atu bantukin thila cang ko,an tong ko" tiah a thimi i a vaapa Lalzarzoa nih a chim. Motor ai lehnaak a ruang cu fiang tein kan thei lo nain a dang motor mongmi nih a chim naakah motor mongtu ( driver ) ai hngilhpah caah asi kho tiah a chim.A thimi nu i a ruak cu Bawngkawn palik camp ah an chek hnu ah Aizawl siizungpi ah postmortem an tuahṭhan lai tiah thawng kan theih. Ai hliam,hma a pumi ( 5 ) lakah ( 3) hna cu an i hliamning a faaktuk tiah theih a si i an Kutkiak,an Lu kuai,an mit an i khawn kong le anmah hna zong cu siizungpi ah an thlop hna tiah thawng kan theih.
(Ref: Lai Miphun Yahoo Group)

Malaysia ram i a ummi kan Laimi hna nih Pathian thangṭhat zaihlasaknak puai "Music Festival Of Praise" cu June 05,2011 zarhpini zaanlei suimilam 6:00Pm in 10:30Pm tiang KLBC (Kuala Lumpur Baptist Church, Lower Sanctuary Hall) ah tuah dingin timtuahnak an ngei. Hi zaihlasaknak puai i Music a tumtu ding pawlah Salai Cung Aung(Desert Rose) hruainak in tulio awnmawi tumcawnnak i a sianghngakchia pawl, Keybord-Sarah(Korean), Bass-Ding Lian le pawl hna an si lai.
                                          Special Guest sining in Drummer For Christ (Malaysian Chinese Drummer) pawl nih Drum an tumthiammi an pahrang(talent) he an rak telpi hna lai. Hi Drummer For Christ  pawl hi March 07, 2011 chunng i "Chin-Talent Show", Lai Christian Fellowship i an tuah lioah, an rak telpi bal cang hna. Drum an tumthiam ninghi a maak ngaingai. DFC pawl hi vawlei pumpi i a ummi Khrihfabu tamngai zongnih an sawmmi hna an si.
                                       Kawlram leiin Gospel hlasak thiam minthang Sang Pi, Sung Tin Par, Hute, Steven Lian le Mizoram leiin Bethsy Lal Rin Sangi(Anu Falam + Apa Mizo) pawl an si lai. Malaysia ram chung leiin hlasakthiam Mai.Sui Nei Zing, Mai.Kim Kim le Mai.Sui Van Pen tepawl in Pathian hla dawhdawh he thangṭhatnak an ngei lai. Hi "Music Festival Of Praise" tluangtein tuahkhawh asinak hnga le Pathian a sungparnak ding ca-ah, kan umnak cio in thlaza camnak he ṭanlak cio dingin sawm kan si. (Leipum zumtu tampi nih an ngeihmi pahrang(Talent) Pathian sunparnak i an hman bangin kan nih Lai mino pawl zong kan thiamnak a phunphun cu Pathain sunparnak ah le miphun thanchonak ah hmang hna uh si. Lai Mino pawl tho in dir hna uh sih!!)

(Ref: Chinworld.info)

　

Lairam khualipi Hakha khua ah May 2, 2011 zinglei suimilam 3:00 am ah Pi Khun Tawi ( Pyidawta sang ) i a ummi hna an inn a kaang dih tiah thawngtheih asi. Mei arak i thawnkning zong hi cokaa leiin asi tiah thawngtheih asi. Mah a kanghnak chungah hin Pi Khun Tawi afale pahnih le An Pu le a mah (minung 4 ) hna cu khamhmanh loin an dih lak a kangh chih hna. A pawng inn khat  zong a kaang chih dih. An Inn hnih ning tein zei thilri hmanh an la manhlo. Inn khat a tlaih chihmi balte cu a minung cu an luat tiah theih asi.Pu Khua Thawn nih achimnak ah "Mei a kaanghning hi an Pu hi atar tuk cangmi a si i, a zukmi kuakbul a kangmi in kangh dawh a si" tiah achim.Pi Khun Tawi hi Salen khuami asi i, Hakha Auto ah zungrian a ṭuan i,Ava hi Pastor a si.Thantlang lei thawngthachim a kal karah a si.Hibantuk in ngaihchiat a tongmi hna chungkhar caah kan umthutnak hmun cioin ngaihchiat pinak le, thlacamnak he ṭan rual lakpi i zuam cio hna uh sih.
        

   Laimi thongsawmnga (50000) leng umnak Malaysia cu holh kan i theihlo ruang le kan umnak ah hlat deuh ruangah mah le umnak cio ah hawikomhnakbu (Christian Fellowship) ngeih cio a si. A bikin Kuala Lumpur ahhin Fellowship 40 lengkai
hrawng a um lai ti theih asi. Tiddim lawnglawng hmanh ah Fellowship 20 leng an um tiah kan theih. Malaysia ah Fellowship/Church/Community hi Local deuhin um cio a si i ,hmunkhat ah hawikomhnak " Bu " ngeihkhawh arak sibal lo..
Cu caah Malaysia a ummi Laimi  Fellowship/Church /Community upa hna nih khua an khaan i "Malaysia Chin Christian Union " (MCCU) cu March 21, 2011 , Mie Christian Fellowship Biakinn ah dirh a si tiah thawng kan theih. Atanglei i hi MCCU ah Fellowship/Church/Community a telmi pawl an si.

01. Chin Christian Church of Malaysia
02. Falam Christian Community
03. Falam Christian Community
04. Lai Christian Fellowship (Falam)
05. Khumi Christian Fellowship (Paletwah)
06. Malaysia Lautu Christian Fellowship
07. Malaysia Mizo Community
08. Mara Christian Fellowship
09. Matu Christian Fellowship
10. Mie Christian Fellowship
11. Mizo Christian Fellowship
12. Senthang Christian Fellowship
13. Zophei Christian Fellowship
14. Zotung Christian Fellowship hna kan si.


Komiti aiawh in Za Mang nih a tialnak ah "Chin Christian Fellowship (CCF) le Cho Christian Fellowship (Mindat) zong an EC cio ah hnatlaknak an lak lai i MCCU ah lungkhattein kan dirti cio lai tiah ruahchannak kan ngei" tiah atial

MCCU nih an i tinhmi pawl;

01. Malaysia um Chinmi dihlak naihdeuh le lungrual tein riantuan tinak
02. A pipa deuh le mah Fellowship /Church/Community nih a tuaktan
khawh lomi harnak ton sual tikah tlangtlak pinak le bomhchanhnak
03. Local Khrihfabu Hawikomhnak (National Evangelical Christian
Fellowship) he pehtlaihnak
04. Pastor Visa (Relogious Visa) hmuh khawhnak a lam kawlnak
05. Ramleng um Chinmi hna he i pehtlai in riantuan tinak... etc. hna an si.

2011 kum chung MCCU OB hna cu;

01. Chairman : Rev. Za Mang , Zophei
02. Vice Chairman 1 : Rev. Run Cung Mang, Falam (Lai)
03. Vice Chairman 2 : Rev. Tin Aung , Matu
04. Secretary : Rev. Francis Za Thang, Mie
05. Joint Secretary : Rev. Twa Mann ,Zotung
06. Treasurer : Rev. Za That, Senthang
07. Asst. Treasurer : Rev. Bawi Thian Thein, Falam
(Senthang Forum)

Kan ram thatlo rauang i ram le Miphun caah Dothlennak a tuanmi hna CNF/A in, Tawngmangham Pu Solomon le Thla Hei hna cu Pathian lamhruainak in Australia um  Lai miphun sinah Khuakip/ State  kipah an tlawngkho hna ti thawng kan theih. "An caan aa tet deuh caah sau an cam kho lo. Asina in, An kalnak kip  le bia an chimnak kip ah lungtho tein don le cohlan an si caah lung ahmui ngai ngai" tiah Kawi Er nih Chin Mino biaruahnak le a dangdang biaruahnak ah a tial.

Australia  Lai Miphun an tambiknak hmun asi mi hna , Pert, Adelaide , Melbourne , Brisbane khua hna ah din loin, an tlawng kho hna ti zong kan theih."Khua kip an kalnak Laimi pumpak le abu in siseh, Biaknak in siseh ,,,  an rak cohlan hna lawng siloin, CNF/A nih  Lairam caah Dothlennak riantuan ding le hmailei chunmang vialte lungthin i hmuhnak mei an kau khawh tihi hmit hmuh kut tonghin  alang ngai.  Zeicahtiah,hngakchia tilo, Nu tilo, Tar tilo ti awkin, ChinLand Club ah luhduhnak thinlung le CNF/A thazaang kan thawnter ahcun Kawl  ralkap cozah kan doh asi i, Kan miphun luatnak rian kan tuan asi cang timi lungput kha mikip thinlung ah a um cang" ti'n Kawi Er nih cun a tial.

          Tutan Melbourne Laimi  cu Pu Solomon le Thla Hei i hmunkhat  tonbiaruahnak nih Mikip an thinlung  afianter ngai hna. "Chinland club luh lawng siloin, mah le lungtho tein  hlut mi ( Donation ) Phaisa Doller tampi hlutu zong  an um. Riantuan loin Sianginn kailio hmanhnih tawr le cheng an hlutmi ka hmuh tik ah an tuh mi thlaici a nung tiah ka hmuh i pumpak in ka lawm ngai" tiah Kawi Er nih cun ati chap. Tongmangham Pu Solomon le Thla Hei ankhualtlawnnak le tonbiaruahnak nihhin zeitlukindah mi lungthin a thlen e  zeiltukindah Laimi phun kan tuarnak le kan harnak kha fiang tukin an chimhkhawh hna ti kha fiangtein kan theih ca-ah lunglawmh awk ngaingai asi.
Atang lei i video clip hi tutan Melbourne Laimi sin i baitawi an chimnak asi.

                   Rakhine ramkulh Kyautdaw khua(myone) ah Apiril (21) ni ahkhan a vaa pa nih khual an va tlawnnak Inn ah a nupi a thah hnuah an tlunnak Inn zong mei in a duah i, Inn (31) a kaang tiah cozah thawngthanhnaak nih a ttial.
 
              Cozah thawngthanhnak nih a langhternak ah cun, Kyautdaw khua chaklei Tinmah khuate ah a ummi U Mee La cu U Ah Kyaw Che (32) le a nupi Daw Ah Phyu Che (27) nuvaa hna pahnih nih an rak tlawng hna  tiah kan theih. Cuti an tlawnlio hna ah cun an nuvaa in an i si i a vaa pa U Ah Kyaw Che nih naam in a tuk i a nupi Daw Ah Phyu Che a thi. A nupi a thah hnuah an
tlunnak U Mee La inn zong mei in a duah tiah a ti.

             U Mee La inn in a dang inn mei nih a tlaihchih hna caah Inn (31) a kaang. Inn a kaangmi (31) lakah hin minung umnak inn (29),primary sianginn (1) le zayat a sawng pakhat hna an si. A man in tuak ahcun Ks ting(86) hrawng an sung tiah asi.

              Inn a kangh ruangah cun inn chungkhar (29),upa he hngakchia he (79) le nu (79) an zaate (158) hrawng umnak nei lo an si tiah thawngthanhnaak nih a langhter.
(Ref: Narinjara news.)

Tuzing (April 17, 2011) ah Malaysia ummi, Laimi ralzam a simi, Pu Peng Thang (Kum30) cu a rianttuantti a hawi le pahnih he Bukit Cheras Alam Damai (Kuala Lumpur, Malaysia) ah an i vel. Pu Peng Thang hi Matupi peng, Leiring khuami a si . A  veltu a hawi le pahnih hna zong cu Matupi peng veve an si. An min cu Kui Loep (Leisen khua), le Zaw Ki (Bunghung khua) an si.
                                 Peng Thang i a chungkhat pa nih a chimnak ah cun “An i  velhnak a ruang taktak hi kei zong ka thei lo, asinain, phone in a rak kan chawnh i ka val kal ah cun Peng Thang pum cu thil lawng tein a khat i a hmai hi a zoh in zoh ngam lo ding phun khin a um”  tiah a ti.
                      “Ka va phak ah hin a thi cu a thi deuh rih lo i a thaw cu a chuah pah rih nain zeibia hmanh a holh kho ti. Palik ka auh hna i palik nih a naihbik nak sizung ah an tlik pi colh. Cuhnuah, cu sizung ah a nunnak cu a liam” tiah Peng Thang chungkhat pa nih cun a chim.A thattu a hawi le pahnih cu zinglei suimilam 2am tluk hrawngah palik nih an tlaih ve hna i a tuhi Bukit Cheras Alam Damai Palik zungah a chiah ko rih hna. Ttuanvo ngeitu nih a herhmi hlathlainak a tuah cuahmah liopi a si..
(Ref: Chinlandguardian)


(Ref: http://www.chinlandguardian.com/news-2009/1296-one-died-two-arrested-over-fight-in-malaysia.html)

HYF thawngthanh ca nih atial nakah "Hakha khualipi April 19-20 ni ah nihnih chung Media training tuah a si. A nihnih nak a dih ni ah Chinland Media Network (CMN) tiah min bunh in a tlamtlin chungnak committee zong derh le tuah colh a si.Hi training ah Hakha in minung paruk hrawng sawm an si. Thantlang lei in minung paruk hrawng sawm an si ve i, training a kai khomi dihlak hi minung 15 hrawng kan si. Training chimtu hna cu Salai Ceu Bik Thawng le Salai Mang Hre Lian an si.. A chimtu zong an thiam taktak. An kan chimhmi zong a tha tuk. A kaimi paoh kan i lunghmuih cio dih hna. May 15 ni ah a tlamtlingmi committee ser i, rian
zong i phawt colh dih i, rian zong tuan hram dawmh colh dingin timhtuahnak an ngei. CMN an derhhnawhchannak cu, Zalong tein Laimi nih Lai caholh, Lai nunphung thanchoter le kil vennak le pakhat le pakhat a kan pehtlaihtlaihtertu si kho dingin timhlamhnak a ngei. Hakha ah zung derh i, News paper, zarhkhat ah voikhat tel chuah dingin le Monthly News, Journal tiang chuah khote dingin saduhthahnak le timhlamhnak a ngei." Hi CMN nih Laimi caholh,nunpung hna  le thawngpang tiang chuak kho dingin  an i timhlamhnak cungah Pathain tunih khuaawng tu tonter ko hna seh
(HYF)